Desaparece Roberto Folla Pato

kb24

Roberto Folla Pato, de 33 anos, vive habitualmente neste lugar da Calliqueira, no concello coruñés de Narón. Na vivenda familiar recíbenos a súa nai, María, xunto co seu marido. María conta que a última noticia que tivo do fillo foi o xoves día 1. Daquela chamouna desde A Coruña para dicirlle que sobre as catro da tarde ía coller un autobus para León para ingresar no centro Reto.

"Está confirmado que colleu o autobús, que o acompañou un rapaz do centro Reto, pero alí cando tiña que baixar, ían recollelo, xa desapareceu. Non saben onde, pero sospéitase que pola zona de León", di a nai de Roberto.

Roberto ten esquezofrenia e a súa nai teme que deixase de tomar a medicación. Desde a súa última chamada ten o teléfono apagado. A nai non sabe como ía vestido pero cre que con vaqueiros e camiseta, como ía habitualmente.

O marido de María fai un chamamento ao condutor e aos pasaxeiros do autobús no que viaxou Roberto, por se baixou nunha parada anterior a León.

"Fago un chamamento ao chofer de autocar ou a algún viaxeiro que puidera ir nese autocar, se o viron baixar nunha parada anterior a León capital, por favor que o comuniquen ás forzas de seguridade", di o marido de María.

Non é a primeira vez que Roberto Folla falta da súa casa. No ano 2007 estivo desaparecido 18 meses ata que o atopou a policía en Vigo. A súa nai asegura que non leva diñeiro, polo que non perde a esperanza de que poida volver á casa andando.

http://www.crtvg.es/informativos/buscan-un-mozo-de-33-anos-desaparecido-na-coruna